بديت باسم اللي بالاسرار يعلم
الخالق اللي نزل الحق تنزيل
اللي خلق آدم ويجري به الدم
سبحان ربي يحيي الارض بالسيل
منجي سفينة نوح والموج يلطم
لله تكبير ولله تهليل
ومن بعد هذا جيت وابغى اتكلم
واهدي نصيحة للرجال الحلاحيل
بالمعرفة والعلم الامة تقدم
العلم نور والجهل ظلمة الليل
والمدرسة والبيت والأب والأم
لهم فضل بالتربية يا رجاجيل
اولادنا اكبادنا لاتندم
كونوا معاهم درع عن كل تضليل
ترى الطفل من والديه يتعلم
ودايم يقلد والده بتفاصيل
ابنك صغير علّمه لين يفهم
لاتصير قاسي يبغض العلم ويميل
واجب تعلّمه احترام المعلم
«قسم للمعلم باحترام وتبجيل»
تراه مثل ابوك واخوك والعم
في واجبه لاتنقص المد والكيل
يابني ترى استاذك عزيز مقدم
هو قدوة الاجيال جيل بثر جيل
معلم الاخلاق والعلم يسلم
الله يفكه من صدوف الغرابيل
وختامها مني صلاةٍ تختم
على الرسول اعداد وبل الهماليل
