يا سيف يا شمس الحياة وسفرها
يا نور دربي والعيون ونظرها
يا سيف يا تاج على راس مرفوع
وطى وطاح التاج «نفسي كسرها»
والخاطر اللي شبشبت به لهاليب
موتك جلل ودموع عيني نثرها
والنفس صارت مرتع الحزن والضيق
من كثر ما الدنيا عطتني كدرها
لا عاد فيه أم ولا أبو ولا رفيق
ولا حبيب بعدهم لي جبرها
يا سيف خذني للقبور الملاحيد
أدور اهل أنتمي لو لثرها
طابت وفاض الخاطر من المكابيد
وهموم عمري طولت بي سهرها
أضحك وكني جرة تنثر الطيب
وجروح قلبي غايرات حفرها
يا آخوي أنا ما آبيك لجل المطاليب
آبيك عزٌ لنفس «موتك كسرها»
