لاهانت الصورة ولا اسم الجريدة
على الوطن صورة وعنها مقاله
قريت عنها وستفزت قصيده
في راعي الصوره ودور البسالة
يا رشيد يفداك الولد والوليده
علما على طاريك يسبق مجاله
عليك دمك نازفا من وريده
واقول دون ارضه وعرضه وماله
الله يمدك بالليال المديده
وخاين عهدنا الله يقصر حباله
يا عزوة بلادك وفخر البديده
مهبط وحي ربك ودار الرسالة
لو حصل شيا عكس شيا نريده
ما مات مجدا ميتينا رجاله
ولا نفقدك رغم انك اكبر فقيده
دون الوطن حنا وطنا فداله
فيه المجادل ضعف عقل وعقيده
نقطع لسان اللي وطنا جداله
ما يسلم الشارد ولا له شريده
لابد تلوي مع يمينه شماله
ولو تستجد علوم غير الجديده
ما لاهلها عنا مفر ومحاله
نكيد للكائد ونلعن كديده
لو حال دونه سيف عمه وخاله
اللي خلقنا الله وحنا عبيده
من خوفنا مات ارجل من ظلاله
لا خاب فينا ظن فهد وعضيده
املوكنا اللي يملكون العداله
اهل هلا وهل الخصال الحميده
طبق الاصل نسخه لبوهم عياله
فينا ثقتهم قلبها من حديده
وفيهم تخيل من وصفها خياله
ولهم ولانا اللي عطاهم يزيده
يضاعفه ما يضعفه قيل قاله
الله هداهم للعلوم الرشيده
ولهم هدانا الله جلا جلاله
