هو يبيها مثل «روز» وهي تبيه مثل «جاك»!!

ما أدري ليش ما جا طاري خطبة وزواج يكون التركيز كله ينصب على الجمال الخارجي ولا يجي في بالنا الا الممثل الفلاني والفنان العلاني وخشة هذا وسنون هذي وحنا نعرف ان الجوهر بالداخل مهو بالخارج والمظاهر الخارجية هذي ديكور بس وش بيفيدني لا صارت زوجتي ملكة جمال لكنها غثة ومتعجرفة ومدلعة ومايقة وطلباتها تهد جبال وو.. وبرضه عشان ما انحاز لفئتي التمساحيه وش بيفيد البنت لا صار زوجها على غرار تاركان وعلى طقتهم في الوقت اللي ما تحس معه بأي ذرة رجولة وبدون ما أبالغ يمكن تكون هي الرجال وهو المره، صدقوني ما ذبحنا إلا هالقنوات وهاللي يتراقصن في الفيديو كليب وهالعارضات دمروا عقولنا وخلو كل وحده أو كل واحد يبي فارس الأحلام على شاكلته وبمواصفاته هو يبيها مثل روز وهي تبيه مثل «جاك» وبالتالي ما راح نحصل لا هذي ولا «ذاك» وعلى فكرة ترى اللي قاعدين نشوفهم يتميلحون قدامنا مختارينهم بدقة متناهية يعني لاقطينهم بالمنقاش عشان العرض ولا تهون أمور التلميع والساعات الطويلة قدام المرايه والتلييص اللي يعمل عمايله والدليل قبل فترة قريبة قريت تحقيق عن زيارة شاكيرا للبنان يحلف بالله معد التقرير ان شاكيرا بشكلها على الطبيعة أقل من عادية ومهيب ذيك اللي سحرتنا في الشاشة وأنها لو بتتشمى بدون هالة اعلامية كان يمكن يعطونها خمست اريل يحسبونها تشحذ «الله يعطيك يا حجية» من الغلط ان حنا نجي لامهاتنا ونقول نبي وحدة بجسم بريتني وخشة هيفاء وهبي وغمازات جوانا ملاح، وشوشة فطومة وبالاخير لا بنا في باله هالامور وشاف حرمته قال ليتني ما خذن مريم نور اهون لي، مجرد صدمه وردة فعل بس، باقول لكم شي سلبي في البنت السعودية وطبعا البعض مو الكل «تحسون مو ماركبت» هو الغرور في حالة الجمال يمكن هالشي يخلينا نستنتج ان الجمال نادر بينهم عشان كذا صارت الموقه والتعالي اقول يمكن باقول لكم سالفة صحيحة تسولفها الوالدة بعد ماجت من عزومة تقول جو بالعزومة بنتين هنديات يأكلن العقل لدرجة اني تمنيت انهن سعوديات عشان اخطب وحده منهن لك يوليدي بدال منت ملحط وتقول انهن ماكلات الجو كله على الحضور والكل يتكلم فيهن ويبخزهن بعيونه «مدري تلقون كلمة بيخزهن في لسان العرب والا» ووحده منهم بتعرس بعد اسبوع على هندي «شكله بيزفها على سيكله والمهر سطل هبهر».. طبعا الزواج بيتم بشكل اقل واقل من عادي مو عشانهم متغربين لكن قنوعين ومتواضعين والا يقدر يزفها في غرفة فوق السطوح ويجيب ذاك اللي يعزف بمزمار على حبة كوبرا طلبية تتراقص وتهز وسطها وقضينا بلا فيفي عبده بلا هم بذمتكم السؤال اللي ماسكه الكهرب ويلقط بروحه هنا لو هالجمال على وحده سعودية وش بتسوي؟ يا ساترررر الشر برا وبعيد يارب اللهم اجعلها حلوم خير تتفتفف تفف، مالكم بالطويلة يا بعدي الجمال مرغوب ما اقول لا لكن وش نقول لا صارن اغلب المطلقات جميلات؟ تكفيكم نورمان أسعد.. جمال الجوهر الداخلي هو الأهم وهو اللي يبقى.
لذا عزيزتي الحالمة لا جاك واحدن على غرار هالفنانين وقبس بوجهه افرن وهو يشيّك على الكيكة واحترقت خشته بتعيشي معه باقي عمرك؟ والعكس ينطبق علينا بعد يالتماسيح لا قبس الفرن بشوشة البنت المزيونه واحترقت شباصتها وغدت كنها ديرمانتن في اثم تكرونية برضة بنتركها؟ ما يصحش والله.. والله ما يصحش، عني أنا تكفيني وحدتن تعيش معي بتواضع وتضحيه ومحبة واخلاص «ايه هين بس» وبتكون في نظري أبرك من ملكات الجمال ومواطي رجليها أبرك وأطهر من اليسا وبنت عقرم عفوا عجرم...