يا الله يا رب بالآيات مذكور
من دون ما تشاهد عبيده صفاته
ياللي جعلت كتابك الحق دستور
يؤمن به المؤمن ويسمع عظاته
تجعل خطانا يا ذرا الناس مغفور
يوم البشر كل يدور نجاته
من بعد ذكر الله تهيظت بسطور
القاف زان وحل قطف ثمراته
الله يحفظ دولة العز والنور
سور عن الاسلام تنطح عداته
الدولة اللي ضمنها صايب الشور
من بعد تفريق وحروب وشتاته
صقر الجزيرة مودع الضد مذعور
حر على روس العوالي مباته
عزّم على الاصلاح وأحمد هل الجور
والله حقق له جميع أمنياته
من يعتصم بالله لا شك منصور
يذلل له الصعبه وياقي عثراته
الله يجعل منزله جنة الحور
اللي حكم بالشرع وأعلن ثباته
وبالخير يجزي من حمو كل مقهور
اللي مشو مشيه وصانو وصاته
سعود سعد اللي على حاله قصور
البذل دايم سيمة من سماته
وفيصل هو الفيصل على الضد مسطور
يوريه موته قبل لحظة مماته
ومن بعدهم خالد به الجود ماثور
غمر جميع الشعب فيض حسناته
واليوم حنا نعيش خيرات وسرور
سجل لنا التاريخ بأزهى صفحاته
في ظل منهو عند الأزمات مخبور
ذاك الذي نال الفخر في حياته
فهد الوفا حكمه نواوير وزهور
قاد التطور في نواحي جهاته
للمملكة حامي وعن ضدها سور
والشعب ما يحصي جزيل اعطياته
ويمناه ليث بالملازيم مشهور
ليث تخوف سطوته ووثباته
عبدالله اللي للمعادين ثابور
والطفل والشايب تجيه وهباته
والنايب الثاني يسر كل معسور
جم التسامح لا عدمنا ضحكاته
أولاد أبو تركي لنا شموس وبدور
والشرع من فضل الولي هم حماته
أحبهم صادق من احساس وشعور
ما هو كلام مزيف بورقاته
لو ما كتبت القاف ماني بمجبور
ولا شكني راع الحكي بكلماته
يحفظهم اللي نزل الفيل والطور
عن شر باغين الزمان وطغاته
وعسى هل التخريب في ويل وشرور
ومن راد فعل الشر تقطع نواته
المفسدين اللي مشو درب محظور
ما فكرو هالدرب وش عاقباته
عطوا عن الاسلام تصوير محقور
لا شك دين الله يعلن براته
لا عزهم ربي عسى قاعهم بور
ومن خان يلقى عند ربه جزاته
وعسى ديار العز تبقى لنا دهور
وحكم السعود اللي نعيش بذراته
والحاسد اللي ضدها دمه يفور
يموت في غيظه وكثر حسراته
واطلب عسايه ياهل الطيب معذور
عن بعض زلاّت القلم وغلطاته
شاعر يقول الصدق في غيب وحضور
يكفي سكن حب الوطن وسط ذاته
وصلاة ربي عد ما سال شختور
وعداد هبات الهوى ونسماته
على نبي يرشد الخير مبرور
في طاعة الله سكنته وحركاته
