طالبك ياللي غبت لا ترجع الحين
خد راحتك دام الوفا فيك معهود
واسقي خيالي من ظما شوفتك لين
تروي طيوفك ناظر فيك موعود
خل الثواني تشعر بغيبتك زين
وانس السؤال اللي بغى منك مردود
دام الغلا يزداد وانا بعيدين
ما للمسافة بيني وبينك حدود
اوري فقدك وانت في ناظر العين
لكن لقيتك وانت بالعين مفقود
من وين ما سافر بك الوقت من وين
تبقى.. واحس انك بكل شي موجود
رغم اني اسأل عنك وأشكي من البين
واحسب متى يا فرحة العمر بتعود
ما ودي انك ترجع الا عقب حين
ودي بطول البعد.. واشتاق لك رود!!
