نجد فرحت ورياضها ليلها زان
وشبه الجزيرة رحبت من طربها
وهبت نسايم نجد وردٍ وريحان
والعاصمة لبست سبايك ذهبها
وبن الدلال وهيلها فاح طربان
وحتى القلم جزل القصايد كتبها
كلٍ وقف تبجيل لقدوم سلمان
شيخاً وطولات المعالي كسبها
يا مرحبا بك يا سلايل كحيلان
ترحيبة فوق العيون وهدبها
من شاعر غنى على زين الألحان
جزل المعاني صاغها وانتدبها
عندي ولا وأحب ذربين الإيمان
ملوكنا اللي نفتخر في نسبها
يا بوفهد يا خو فهد طير حوران
يامير نجد وعزها في طلبها
أنت اعتليت المجد للمجد عنوان
كفك تبشر بالسعد من شببها
وأنت الذي للجود والطيب ربان
المرجلة منك تسلف رتبها
تعطف على المسكين وإن ثار دخان
منك السباع تقوم ترجف ركبها
تاقف مواقيف الشجاعة والاحسان
ويمناك تروض بالموافق صعبها
عز الله إنك قمت بحقوق الإنسان
أمانةٍ أديتها وابشر ابها
قايم على رعاية أطفال واسكان
تجارةٍ عند الولي تحتسبها
والعاصمة خليتها أشكال والوان
بخضر الحدايق والنخيل ورطبها
يا سيدي حبر القلم جف عجزان
ما تنحصي افعالكم لو حسبها
وختامها صلوا على نسل عدنان
على نبيٍ اصطفى من عربها
