الجواد اللى تعلا مثل براق المخيله
في سماء عمان والجمهور صفق له الحاله
يوم مر وفز للخيال واسمعنا صهيله
قلت ما شا الله عليه وكل من حياه قاله
من وصوفه عارفينه بالجمال اللى يهيله
يكفي العشاق شكله لو حصل صورة خياله
لو بوصّف ما يوصف ما لنا بالوصف حيله
اشهد ان الوصف في مثله من الصعب اكتماله
لو حكينا ما حكينا ما عطينا الا قليله
لو كتبنا عن «ربيع ثان» ما اوفينا خصاله
الطويله مربطه والله الله يالطويله
اسمك اللى شاع والمربط ترى كلٍ دراله
من انتاجك شرفينا بالخيول اللى اصيله
مثل ما شرف «ربيع ثان» في يوم احتفاله
يالطويله ما كسبنا منك يا غير الجميله
مثل ما حنا كسبنا واحدٍ كله جماله
الامير اللى عرفنا صعب ما نلقى مثيله
من مثل عبدالعزيز بطيبته وبحي فاله
الامير اللي اليا ضاقت على الواحد يجيله
ما يروح الا وهو من سيدي مرتاح باله
ما نمل مشاهده في كل يوم وكل ليله
يشهد الله من نشوفه بس يكفينا قباله
القصايد في سموه ما توفي مستحيله
والغلا لو قلت غالي والله إنا كلناله
الطويله عز وانت العز ياراع الطويله
المرابط من سلاله وانت يا نعم السلاله
