يا صاحبي طال الدهر بي وأنا ارجيك
عساك تافي ما تخيّب رجايه
أرجيك والله يا أريش العين وأغليك
وكل الوفاء لك والغلا في حشايه
ما غيرك أحدٍ بالموده يساويك
مقصودي أنت وغايتي في هوايه
أنت الذي ما أخذ بدالك ولا أصخيك
ما دمت حيٍ لك جديدٍ غلايه
يا زين من كل الغنادير هاويك
ما غيرك أحد صار للقلب غايه
حلوٍ حسين وصوف والرب حاليك
من كل خلقه صورك كالمرايه
كل الحلا والملح والنور غاشيك
وشوفك يعيش به العمر يا منايه
اصافي اللي بالمحبه يصافيك
وعداك يالغالي تراهم عدايه
يفز قلبي كل ما حل طاريك
ومن زود حبك باح خافي عزايه
والعين ما تنظر لغيرك تراعيك
حبك غزير مال حبك نهاية
هذه ثلاث سنين متولعٍ فيك
لا وا عذابي كان طاول عنايه
مريض وأنت دواي ما فيه تشكيك
يا زين لا تبخل وعندك دوايه
