يا دار وين اللي بك العام كاليوم
ماكن مرك عقب خبري نجوعي
خالي جنابك بس يلعب بك البوم
ماكن وقف بك من الناس دوعي
شفت الرسوم وصار بالقلب مثلوم
وهلت من العبرة غرايب دموعي
وين الجهام اللي بك العام مردوم
وضعون مع قدوه سلفها يزوعي
أهل الرباع مزبنة كل مظيوم
وأهل الرماح مظافرين الدروعي
راحوا لنا عدوان وحنا لهم قوم
ولا ظنتي عقب التفرق رجوعي
وان صاح صياح من الضد مزحوم
تجيك دقلات السبايا فزوعي
صفرن يكاظمن الاعنه بهن زوم
يخلن مسطور المجانين يوعي
خيالهم ينطح من الخيل حثلوم
يوم الاسنة بالنشامى شروعي
ويا شيخ انا عندك معزز ومحشوم
ويمضي علي العام كنه اسبوعي
لا شك قلبي بالوفا صار ماسوم
لربعي وانا يا شيخ منهم جزوعي
وعيني لشوف الحيف ما تقبل النوم
والقلب يجزع بين هدف الضلوعي
ويا شيخ ابا اوصفك يا مغني الكوم
يالساطي القطاع حسن الطبوعي
حلياك حر ابرق الريش ملحوم
متفهق الجنحان حرٍ قطوعي
حر علم بالصيد من غير تعلوم
يودع بداد الريش شتى مزوعي
