لعله يسلم المهر الحمر لمح البصر ويعود
لميدان الملك عبدالعزيز ولانتصاراته
مثل يومه خذا كأس الموحد والجميع شهود
نهار انه حضر وأثبت حضوره وأعلن إثباته
حصان حقق أغلى كأس بالخطة وبالمجهود
عساها أول بطولاته ما هيب آخر بطولاته
أخذ مجده بجهده وأدرك المأمول والمقصود
هقا به فيصل ولا خيب كحيلان هقواته
لحقهم من وراء والخيل تدفش والحمر مسنود
ويا ما شاء الله تبارك يوم قال اللي معك هاته
بدون مضايقة جاء منسرد واليا طلبه يزود
يظمد مثل ظبي جافل من راس مفلاته
صمل وأطلق يمين تبعد الطارد من المطرود
تخاف آليا اجتمع ثم امزع تنقص مثناته
رفع رأسه وجاك بلامه أبيض والمعارف سود
وهو يزهى البلام وتعجب أهل الصنف طلعاته
يقوله شاعر حاول يصور واقع مشهود
عساها تعجب اللي في حصانه قيلت أبياته
نهاية ما ذكرت إعداد ما ذعذع نسيم النود
سلام الله على فيصل ورحمته وبركاته
