يالله يالمعبود يالفرد الرقيب
يا عالم اسرار البشر واحوالها
يا قابل الدعوة ولا غيرك يجيب
يا مقدر ارزاق الملا وآجالها
تنصر نصير الدين وتذل الغريب
اللي خراب ديارنا يسعى لها
وتعز حكام الجزيرة يا مجيب
سنة محمد قاضبين حبالها
فهد فهدنا راعي الراي الصويب
كل الامور المعضلة حلالها
فيه النقا والحلم والصدر الرحيب
والعزم والطولات كل اشكالها
حرٍ عريب من نسل حرٍ عريب
شيخ شمخ شم المعالي طالها
وقايد حرسنا لولب القوم اللبيب
عسر الحمول الكايدة شيّالها
صبّار صارم صيرميٍ ما يهيب
صمصيم صعبات المراجل نالها
عز الرفيق ومن عناله ما يخيب
ذل العدو لامن رجف زلزالها
وسلطان سلطان السخا كارٍ وطيب
يمناه غيثٍ ما تعد افضالها
حاتم زمانه للغريب وللقريب
حاش المراجل دقها وجلالها
وسلطان سلطة للعدو سقم الحريب
لاشبت الهيجا تره ريبالها
قايد دفاع المملكة حصن صليب
جيشه مصخر للبلد واجيالها
جيوشٍ أبيّه ما تذير ولا تهيب
وقت الشدايد خابرين افعالها
تحمي حدود بلادنا شرق ومغيب
جو وبحر وهضابها وسهالها
ويا طامع ببلادنا مالك نصيب
الدار ياقف دونها رجّالها
حنا غدير الموت باليوم العصيب
نتكي ونرسي مثل صم جبالها
والحق حق ودوم شمسه ما تغيب
والمخزيه خزيٍ على عمّالها
والبوم ينزل بالخرابة والقليب
وطيور شلوى عاليٍ منزالها
ما نامن الدنيا تطيب ولا تطيب
ما تنومن باقفايها واقبالها
ويوم الوطن يا ابن الوطن يومٍ عجيب
ذكراه عزٍ للبلد ورجالها
وماني بشاعور واديب ولا خطيب
فردٍ سعودي والتميمي قالها
والخاتمه صلوا على طه الحبيب
ما ناض برقٍ واستهل خيالها
