نظمت الشعر في حب الوطن واعسف له القيفان
وكل يعلن الفرحة ويوصف صادق شعوره
وطنّا له مع الافراح موعد بأول الميزان
وطنّا يا عسى عيده يعيد بكامل سروره
نحبك يا وطنّا والمحبة تسكن الوجدان
وعيدك فيه نفرح ونتباهى بأجمل الصوره
نحبك يا وطنّا والوطن حبه من الايمان
نحبك يا الوطن والنفس لك بالحب ماموره
وطنّا قبل توحيده متاهة غدر للانسان
جزيرة موحشة بالظلم فيها دروب مخطوره
وبعد ما جا لها صقر الجزيرة يقطع الوديان
وصوت بالرياض الحكم لله ثم اخو نوره
وبدا يجمع شتات المملكة ويحرر البلدان
ونظمها نظم عقد من عقب ما هيب منثوره
ولانت له اخاديع البلاد وثبت الاركان
وبسط باع العدل فيها وشع النور من نوره
وخلف عقبه رجال لهم بالحكم اعظم شان
سعود وفيصل وخالد لهم اعمال مذكوره
ومن عقب الثلاثة جا فهدنا مسدي الاحسان
فهدنا اللي اذا ضاقت علينا نتبع شوره
فهدنا كاشف الهم وفهدنا المعطي المعوان
الا يا كثر اياد له بفعل الطيب مشكوره
وولي العهد عبدالله الامن راغت الاذهان
صميدع كلمته سيف على العدوان مشهوره
وسلطان اذكره واذكر بعد نايف هو وسلمان
رجال فيهم اوصاف العدل والجود مبذوره
وحنا الشعب وآل سعود هم حكامنا الشجعان
رضينا فيهم وكل عليهم يوصي بزوره
تعيش المملكة حره لها مبدأ الشرف عنوان
وهي بالدين محمية وهي بالدين منصوره
ومن ينوي يفرق صفنا في نيته خسران
لانا صف واحد والعدو نيته معثوره
سعوديين من اقصى الشمال ونلتقي بنجران
ومن اقصى الغرب جدة لين شرقي راس تنوره
نعيش ولا تحركنا الرياح وقسوة الازمان
ولا نهتم لافواه وفضائيات ماجوره
الا منه نبح عازر وجاوب له ولد عطوان
كلاب من ورى الشاشة تنابح تقل مسعوره
لو انا نلتفت للهرج والتضليل والبهتان
لك الله كان صابتنا من احداث الزمن دوره
لنا ضلع كما الفولاذ قاسي للعدا ما لان
وكما قيل الهوى تارس وما للهرج فاتوره
نحاول دايم نقابل اساءة غيرنا باحسان
ولكن لو تمادى نقمعه ونقصر شبوره
اذا دارت رحى الفتنة نقابلها بوسع بطان
وشوي تصبح الفتنة مع الفتان مقبوره
ومن حاول يفجر او يأيد شلة الطغيان
ترى ما له سوى سيف به الارقاب مبتوره
وحنا نعرف اسلوب الخوارج من قتل عثمان
يجي واحدهم بفكر يخالف فيه ديكوره
يفكر من يخالف منهجه ويحارب السلطان
وحتى لو قرى الآيات تقصر دون حنجوره
ودم المسلم احلى عنده من الشرب للعطشان
وواحدهم لو تحاكيه شفت الكذب من جوره
فقيه القوم يفتيهم وهو عنده عمى ألوان
وما دام ان الدليل غراب ضاع وضاع طابوره
يقول انه هو المصلح وهو قلبه علاه الران
صلاحه خله لنفسه هو وشلته وطيوره
سعوديين ما نسمع كلام المارق الفتان
ولو يحلف بربه سيرته بالكذب مخبوره
وطنّا قبلة المليار مسلم سيد الاوطان
وطنّا اللي يحكم الشرع والقرآن دستوره
لنا شريعة سمحة ونؤمن بأفضل الاديان
شريعتنا عليها النفس مجبوله ومفطوره
لنا عدوان نعرفهم ونعرف منطق العدوان
ولكنّا عليهم والله اكبر نعلن الثوره
ندافع عن عقيدتنا ونحفظ خمسة الاركان
عليها ما نساوم واليهود تموت مقهوره
انا وان قيل وهابي فانا في مسلكي فرحان
انا سعودي ووهابي وفرعي يتبع جذوره
وصلاة الله ورحماته على سيد ولد عدنان
عدد ما تنبت فياض بمزن الوسم ممطوره
