اليوم يوم عمره اطول من الجيل
باقي على مر الزمن بالمعالي
يوم عظيم وحافل بالتنافيل
فجره كريم ومكرماته جزالي
يوم تسطّر للسنين المقابيل
وأصبح على كل المخاليق غالي
فيه ابتدا صبح.. وفيه انتهى ليل
وفيه اقبلت حال.. وراحت حوالي
وفيه انولد حق.. وماتت اباطيل
وفيه انهزم ظلمٍ.. وفازت رجالي
مجده رفيعٍ ما حصل بالتساهيل
إلا بنقدٍ مثل نقد الريالي
نقد النفوس الساطيات المصاميل
في ساعةٍ جا للمنايا اجتوالي
يوم لفى برمز الفعول المذاهيل
راع العزوم اللي من الخوف خالي
عبدالعزيز اليعربي مسرج الخيل
مبدل الميلات بالاعتدالي
شيخ عليه من الصحابة تفاصيل
مشى بشرع الله وانهى الضلالي
يوم انتهض زحل الزحول الحلاحيل
ليثٍ مخابيطه جزالٍ جلالي
خلّى النمور طيور عقب المحاصيل
دقّم مخالبها ببيض السلالي
يطلع مطاليع السعد كنّه سهيل
ويارد مواريد الخطر ما يبالي
الى اعتزى هدّ الحصون المقافيل
والى هوى اركى على الكبد صالي
لين استوت له بالسيوف المصاقيل
وعن الجزيرة طاري الذل زالي
اقفت بسطواته حياة الغرابيل
تقشّعن سحب الشطون الثقالي
أكرم به الله ناس عانت من الويل
واحيا به اوطان وبحور ورمالي
واعزّ به سنة رسول المفاضيل
وأقام به موطن عن الغير عالي
وطن. وطن. محشوم من كل تضليل
معصوم ورجاله تروم الكمالي
فيه المبادئ نور مثل القناديل
يوضنّ بالدنيا من أول وتالي
وطن. وطن. له بالشرايين تبجيل
حب يرخّص له جميع الغوالي
ملجي الدخيل وملجم للمغاليل
صعب على كل اليدين الطوالي
معروف بالعالم عرين المشاكيل
واليا اسألوا يلقون ردّ السؤالي
أنا سعودي لي بالأمجاد تسجيل
تاريخ جدّاني ينومس عيالي
اشرب زلال العز شرب الفناجيل
وألبس وشاح الفخر لبسة عقالي
وانا سعودي اذكر الله بتهليل
واسبّحه واعقد عليه اتكالي
تحيا عروقي بالدعاء والتراتيل
الدين عندي دوم هو رأس مالي
وأنا سعودي ابذل الحال والحيل
دون الوطن الى تمادي الجدالي
سوره وستره بالليال المعاضيل
ووقت الرخاء ابنيه مجد وجلالي
وانا سعودي ضاري بالمواصيل
ارقى على الهقوات واصل منالي
اصبر الى كثرت عليّ المحاميل
واشيل حملي مثل شيل الجمالي
وانا سعودي بالعهد وافي الكيل
آفي ولو جارت علي الليالي
تضرب بي الأمثال ما أخطي ولا أعيل
ولا اخون جار ولا صديق موالي
وانا سعودي وقفتي تعدل الميل
عزايمي هدت شموخ الجبالي
اقف مواقيف نهار البهاذيل
يسمع صداها بالسماء والسهالي
وانا سعودي بالكرم كنّي السيل
يمناي ما تقصر الى جاء مجالي
اعطي واذري وانتخي واذبح الحيل
قولة نعم. عندي تساوي حلالي
وانا سعودي اعشق البن والهيل
واحب فعل الطيب في كل حالي
وأفخر بحكّام عطاهم هماليل
عرب الجدود معرّبين الخوالي
درع الجزيرة كاسبين التنافيل
آل السعود اللي تطول المعالي
