يا الله يامسقى ظما الأرض بمزون
يا اللي لمن يرجيك بالعفو ما خاب
أنت الفطين وباقي الخلق ينسون
وإن صكت الأبواب تفتح لنا الباب
أنت العزيز اللي له الخلق يرجون
تمهل ولا تهمل على العبد بحساب
تضفي علينا الستر يا والي الكون
بالأمن والإيمان يارب الأرباب
وتحفظ وطنا عن عبث من يعبثون
وتجنبه عن كل حاسد وسبّاب
وترد كيد اللي لخلقك يكيدون
اللي بنوا للشر رايات وأحزاب
هم يدّعون أنهم على الخير يدعون
وخلو شعار الدين غايات وأسباب
والواجب أنهم عن هل الدين ينفون
الدين ينفي كل خاين وكذاب
الدين حق وعند الإسلام مامون
وشرحه لنا واضح ومحفوظ بكتاب
الدين عن كل الخبيثين مصيون
كفيله اللي عن مباديه ما غاب
وحكامنا اللي بالشريعة يحكمون
منهاجهم علم النبوة والأصحاب
هم قدوة اللي عن هدفهم يضيعون
وهم عزنا لا صار طالب وطلاب
وفي خدمة البيتين والحق يمشون
ومن مدهم ينعم به أصحاب وأقراب
وعند الوطن وعن المواطن يحامون
حامينهم عن جور عايل وغصاب
سهرانة عيونهم ما ينامون
وهرج المعادي ما يحسبوا له احساب
إلهُم ولاء منا وحنا لهم عون
لو الطلب منا على سوق الارقاب
ربعي شرارة وبالعهد يوفون
ويقفون ضد أهل الخيانة والإرهاب
وقت الدفاع عن الوطن ما يتخفون
يفدون بالأرواح والدم وحراب
وان صار ضد عن اللقاء ما يصدون
يا طون حوض الموت يوم الردى هاب
ما هم من اللي بالفعايل يمارون
لجل الوطن يمشون في درب الاصعاب
لا جاء لزوما كلهم يستعدون
جميعهم يقفون شيبان واشباب
يا مملكتنا عهدك اليوم مامون
في ضل منهم للثقيلات مركاب
حكام نجد اللي عليها يعيون
حامينها عن جور ظالم وطلاب
اشبال ليثا للصعيبات يا طون
تعاونوا بيها عريبين الانساب
آل السعود بحكمهم ما يميلون
والهم على العايل عن الدرب مضراب
الله ييسر كل صعبا لهم هون
ويكفيهم الله شر حاقد ومغتاب
وصلاة ربي عد منهم يطوفون
اللي لفوها من بعيدات الأقطاب
وعداد من حجوا وفيها يصلون
على النبي الهاشمي سيد الأحباب
