ماني مصيف يم لندن وبيروت
مصيافنا يا سعود في مملكتنا
في مملكتنا نعيش يا سعود ونموت
ولا قص راع التذكره تذكرتنا
في ديرة الإسلام ما نيب مشموت
لو ان شدت شمسها حرقتنا
في البرد نلبس دافي البشت والكوت
وفي الحر نجلس تحت ظل انخلتنا
هي عندنا فاقت اوتيلات ماريوت
اللي على بث الدعاية دعتنا
اليا أثمرت طلع كما عقد ياقوت
ما كنها إلا بالجواهر كستنا
عن ديرتي ما شدني زاعج الصوت
اللي على مصياف داره نعتنا
ان كان دزولك دعايات وكروت
عرض المناظر والصور ما خدعتنا
كم واحد سافر وعود بتابوت
الله يحسن يا ولد خاتمتنا
نعيش في دار بها الدين مثبوت
والافكار ناس ضايعه ما لتفتنا
