يالله ترحم من تخفا ولا شيف
كبدي على شوفه شديدٍ لهفها
ما فادني كثر البكا والتلاهيف
أقدار مرنه وراح بطرفها
هو مكسبي لغلقن المصاريف
هو راس مالي بالسنين وكلفها
يالله ياللي بالمطر تنبت الريف
تعوضه الجنة برادٍ كنفها
للي نشدني قلت ما به تخاليف
كل الخساير عند ربي خلفها
لي علةً بين الضلوع المهاديف
يتعب خبير الطب ما يكتشفها
العين تدمع كنها وابل الصيف
والكبد عاصوف المصايب عصفها
أسبابها فرقا القلوب المواليف
اللي من الفرقا ضلوعي قصفها
أنا عليّه من ضروفي تكاليف
شكواي لله والضروف يعرفها
لو كان بالمجلس خيار السواليف
مصغالها بالي ولا من وصفها
قبل أمس بادي في طويل المشاريف
واليوم أسير بالحزوم وحضفها
من لامني عساه ينشد منا كيف
عن غالياً حره بكبده لجفها
يحس بضروفي رجالٍ عواريف
خيار الرجال اللي عزيزٍ سلفها
