هرج يجمع وتنقله الملاقيف
نقالة الهرج ما بين الخليقة
سوالف ثلث منها هرج تزييف
والثلث الآخر ما يعرف له طريقة
واللي بقى صار في معناه تحريف
وكل يزود ويجعلها حريقة
يزين الهرج يا شرابة الكيف
يبغى البشر تنتبه له لو دقيقة
يعطيك علم جديد بدون تكليف
ويصوغ هرجه بنغمات الموسيقة
ويحلف وياصف لك الموضوع توصيف
ويقنعك لو كان هرجه ما تطيقه
ياصف لك الصين ويحدد لك جنيف
ويقول مصادر اعلومه دقيقه
ويولع النار ما بين المواليف
حتى يفرق شقيق عن شقيقه
يحسب الكذب بين الناس تصريف
بقول ملفق وكلمات رقيقه
لكن يا مشعلين النار بالليف
خلو مع الله لكم عروه وثيقه
وعن سكة التهلكه عودوا مناكيف
والحق واضح ولا يخفى بريقه
وتوبوا الى الله قدام الصواديف
في ساعة كل شخص يجف ريقه
ودنيا العنى ما على الدنيا تحاسيف
لا تغرق النفس مع ناس غريقه
شم للمعالي بدين وعزه وسيف
ومن يتبع الحق حذرا لا تعيقه
هاذي نصيحه مابي منها مصاريف
ومطلوب راي الرجال اهل الوسيقه
