الله اكبر كيف ذاك الوقت زال
احسب ان ايامي الحلوه تدوم
يوم همي ما كبر ذيك الليال
والهٍ مرتاح مافيني هموم
كل همي بس اجاوب لي سؤال
المجره كم فيها من نجوم؟
وان قعدت الفجر من حول الدلال
طفل داله مع سواليف القروم
كان يجمعهم حنين وطول بال
وفي تفرقهم يزيد الشوق دوم
بس اشوف الوقت ذا فيه اختلال
مختلف يا ناس ما فيها علوم
والقلوب اتغيرت ما به جدال
والوفاء بين اغلب الناس معدوم
غير قطع الوصل عندي لك مثال
النميمة من رديين العزوم
يفرح الشرير ويقيم احتفال
كان فرق بين قوم وبين قوم
والحسد والظلم صارن راس مال
وانقطع عنا مطرها والغيوم
الله اللي يبدل الحاله بحال
يا الله عطفك يا كريم ويا رحوم
