ما هي غريبة على سلطان فزعاته
والناس تشرب وفاه.. وترتوي خيره
سلطان.. يا كبر معروفه ومداته
لا ضاقت اليد.. يظهر حسن تدبيره
مذكور بالخير.. يا وجهه وبسماته
من جاه ما شاف صداته وتكشيره
سلطان والحب كله منبعة ذاته
بقلوبنا من يوصف حجم تقديره
سلطان والجود لو غطاه بسكاته
يبين بالناس.. معروفة وتأثيره
سلطان من شاف أهدافه وغاياته
قرأ بياضه.. ونياته.. وتفكيره
سلطان.. للناس مثل الغيث جياته
لا صوتوا له لفاهم بالسعد طيره
يا فزعة اللي تحطم من مصيباته
ويا فرحة اللي تهاوت به مقاديره
يا بلسم الصدر لا دخّن بزفراته
يا سيحة البال لا هيجن بتفكيره
الله من عين وقف سيل دمعاته
والله من قلب فرج عنه تكديره
يا رب جازه.. بخيرك من مبراته
طالبك تحميه يا معبود.. وتجيره
ناداني الشعر.. ويني.. وين وقفاته
حتى الشعر حس بالرهبة وتقصيره
يا مخجل الشعر ضاقت بي مساحاته
لو ازهرت لي على ذِكْرك نواويره
