ما ضاقت الا عند ربي لها افراج
الله يفرجها من الضيق والعوج
للناس عند الله من الضيق مخراج
لو كان هم الناس فوج ورى فوج
لا صار في صدرك من الضيق لجلاج
ترى السفينه لازم يخونها الموج
الحال يوم عدل وايام منعاج
والدرب نوب خالي ونوب مسهوج
ايام ترقد بين مخمل وديباج
وايام تسهر عينك وقلبك يدوج
العمر يمضي بين راحات وازعاج
كم مرة نمت متكدر «ومزعوج»
وان شفت يضحك لك من العالم احجاج
يرتاح بالك كنك بعالي بروج
والناس في بحر تلاطم بها امواج
والليل ما يفضح ظلامه سوى سروج
والضيق له عند الله حلول وعلاج
لو ان ضيقاتك كثر «جوج ماجوج»
