كتبت للماضي من الشعر تذكار
على الورق وجفون عيني نديه
حبر القلم دمي ومسحوبه اشعار
من شاعر عاش الحياة الشقيه
يا بجاد والله ما بقى شي ما صار
اسحب خطاي بليلة سرمديه
واسوق رجلي بالصحاري والاقفار
اطيح وانهض والمآسي خفيه
قمت آتلفت وينهي يمة الدار
اللي بها عشت الحياة الهنية
يشهد علي يابجاد علام الاسرار
حبه سرى بالقلب روحه وجيه
شف حالتي من بعدها صرت منهار
اجمع شتاتي من سنين عتيه
ابا اسألك يابجاد يا نسل الاحرار
حايل تبيني أو تناست خويه
أنا نقشت الشعر يابجاد بأحجار
وشبيت نار الشعر في فم حيه
يوم القوافي عاندت كل شبشار
جتني مزون الشعر ترعد عليه
كتبت لاحبابي من الشعر تذكار
الشعر واضح والمآسي خفيه
