صباح النور يا يوم نشوف أغلا الحبايب فيه
ويوم ما نشوفه فيه ماهوب أبرك أيامي
يغيب عن العيون ولا يغيب ليا رقدت أوحيه
واشوفه واتخيل صورته فالنوم قدامي
أشوفه في منامي وانشده وآخذ معه واعطيه
هلا بك مرحبا بك كل ليله يا أجمل أحلامي
تذكرني حبيبٍ تحسب إني فالزمن ناسيه
وأنا ما أنساه لو الطرس ينسى وصل الاقلامي
وعد مني عهد لقدره واوقره واغليه
وقولي يسمعه واوثقه له عبر الاعلامي
علي الشاهد الله واسمعوني كلكم لفديه
بحالي قبل مالي واستريحوا ياهل الاوهامي
الا يا هل النصيحة وفروها لا يجي طاريه
ولو إن النصيحة واجبه في دين الإسلامي
ولكن الهواوي ما يداني كيف وإلا ليه
يثور ليا استفزه واحدٍ عاذل ولوامي
يموت الود في قلبي ولكن الغضي يحييه
على الله ثم خلي بسمتي وزيادة آلامي
تمكن لين صوبني صوابٍ ما قدرت أخفيه
رماني رمش عينه قبل عينه والله الرامي
أروح ونيتي وحده من الثنتين ثم أجيه
أجيله واعترفله واعتذر عن زلة اقدامي
