بين حزن المخاوف، وابتهاج الأمان
جابك الحظ لي وصار راعي جميل
أنت ف القلب ثابت لو تقافا الزمان
موجة الشط ما تجذب ظلال النخيل
بيتك المسك، وإلا جارك الزعفران
فيه باقي وغيرك مرّ عابر سبيل
والثقة قبةٍ لنا تحتها مكان
لا غدا الشك غارٍ ما لنا به مقيل
فوق صفراً مثل دلّك تتل العنان
قم تولّم لدربٍ مثل بالي طويل
أنت لامست بأقصى النفس.. سحر البيان
مثل ما تلمس الأفراح قلب العليل
وساري الطيف، ينثر عطر زهر الحنان
والقمر شاعري، والليل طرفه كحيل
أيه وأحلى المشاعر، تبتسم بالثمان
والنواعس تغني.. والحواجب تشيل
طالع الكف يقرا في خضاب البنان
فلسفة مرحلة مرت، ومفهوم جيل
جت تسوم التثني من عصا الخيزران
والخجل من خدود الشمس وقت الأصيل
وربطة الراس حلت لغز ذيل الحصان
يوم طاح السبيب، وبعد قام الجديل
يضحك النور شوق، ويبكي الشمعدان
أو الحل، وآخر عقدة المستحيل
