على حد السراب اللي لمع للعين وأغراني
تخيلتك وانا اشرب من بحورك يالسراب بحور
وأنادي طيفك اللي كل ما ناديت ناداني
وأجي يمه ولا ألقا يمه إلا عطرك المنثور
تعبت أتصورك حلم السنين وملت أزماني
تعبت ألملم جراحي واداري قلبي المكسور
وترحل ما تركت الا الطعون ودمع الأعياني
وترحل ما تركت إلا الظلام اللي نساه النور
يطول الليل لعيونك يطول وتكبر أحزاني
وأنا ما همني.. ما همني غير أنت يالمغرور
ولكن عاد ربي ما كتب لي غير حرماني
ولا ظنيت لي حظ معك يابو العيون الحور
أبا افنا ما نسيتك وانت من باكر وتنساني
الا ياللي اختزلت العمر كله في ثلاث شهور
على قولك تبي تلقا بدالي واحدٍ ثاني
توريه العذاب وتتركه في غبة الديجور
