الشعر له مع قمة المجد ميعاد
مع سيدي نايف على كل نايف
مشاعراً صوب ابيض الوجه تنقاد
اعذب من الهملول شرداً عسايف
شرداً عن اللي تجهله لهجة الضاد
وعسايفاً للي عشق شخص نايف
ابلغ بيوت المدح في وصف الاجواد
ما تبلغ المقصود في مدح نايف
ولو حاولوا وصفه جماعات وافراد
عجزن عن وصفه بنات الشفايف
ولو للوفا والطيب تاريخ ميلاد
اكيد مقرون بميلاد.. نايف
شخص الوفا اللي بالوفا ماله انداد
شامخ مثل شم الجبال النوايف
نايف بطيبه عن جميع العرب زاد
واضحى ملاذ اللي من الوقت شايف
شيخا لفعل الطيب هاوي ومعتاد
في شخصه اضداد المعاني ولايف
في منهله تلقى هل الطيب وراد
من منهله تنهل جميع الطوايف
ونايف نهل من منهل الطيب واعتاد
حمل الثقايل واستعاف الخفايف
ابوه قاموس المكارم والامجاد
مروي السيوف الماضيات والرهايف
اللي جعل للعاصيه كور وشداد
وبدل سمايلها حرير وقطايف
صفى مشاربها بعد حرب وجهاد
ودانت بعد كانت شعوب وطوايف
وخواله بحور الندا سقم الاضداد
مزار من حافه من الوقت حايف
فعل السدارى بين فوق الاشهاد
وتاريخهم يكتب بيض الصحايف
يا سيدي شوقي لخدمتك وقاد
حب سكن بين الضلوع النحايف
هذي مناي ان كان حظي بها جاد
مالي بعدها في الوظايف حسايف
