ياخوي بالله لا تقولوا يقولون
وكالة مجهولة خلك عنها
وكالة أهل الشك والدس والهون
ما ينعرف ميلادها من وطنها
ذريعة وستار يا حيف ويش لون
تصير مصدر وأكثر الكذب منها
يا سامعي حارب وكالة يقولون
وابعد بعيد عن مواقع عفنها
سند وخل الهرج لا قلت موزون
تسلم توابعها وتسلم دخنها
الكذب مكروه وراعيه ملعون
مذكور بالقرآن وأصدق سننها
الكذب درب مظلم ماله عيون
خطى السلامة فيه ما حد ضمنها
كم دمر الكذاب من بيت مصيون
وأخلى الديار العامرة من سكنها
تلقاه بين الناس فاتن ومفتون
رحولة الشيطان مطلق رسنها
يلعب به الشيطان من دون في دون
ومن طاوعه لابد يخسر ثمنها
وفي الآخرة يحشر مع آل فرعون
نعوذ بالله من سناين محنها
يارب فزعة منك بالحفظ والصون
وتختم لنا بالخير بآخر زمنها
صلوا على المختار ما هلت مزون
وما غرد القمري بعالي فننها
