من مشى بالحق ما فيه واحد يهزمه
بشّر اللي يبذل الخير بالنصر الوكاد
الملك حامي حمى الدار مرفوع علمه
حاكمٍ كل المشاريع في عهده جداد
روس الأعدا كلها داسها تحت قدمه
لين حتى العدل والأمن فوق الأرض ساد
وأبو متعب خطته في المواقف محكمه
هو عضيد القايد اللي عليه الاعتماد
وأبو خالد صاملٍ كل من عال لطمه
نفتخر به في نهار التحدي والعناد
فيصلياً كل كايد بمتنه يدحمه
مثل حراً يعجب العين في وقت الهداد
والجبال الراسية من صدمها تعدمه
ترقد آمن في ذراها لاونك فالطراد
والكتاب اللي بيمنى الطهارة نلزمه
ما نفرط فيه لو روسنا دونه حصاد
والنبي اللي رفع شانه اللّه وأكرمه
طايعينه لو على رقابنا بيضاً حداد
والسفيه اللي كذوباً لسانه وقلمه
ننكره ومشجعينه عساهم للنفاد
كل ما جا عاطلاً باطلاً يفتح فمه
كفر العالم وقال اقتلوا كل العباد
مجرمٍ صوب على صدر الإسلام سهمه
ما جنى لأمة محمد صلاح ولا رشاد
يدعي بالدين والدين بيديه هدمه
حط فوق الصفحة الناصعة نقطة سواد
ينشر الفتنة ويبلي الشعوب المسلمه
بالحروب اللي لهبها يطير من الزناد
والجهاد إنا جنوده وحنا مقدمه
في رضا المعبود نصبر على حر وبراد
والأوامر من ملكنا وحنا محزمه
لا دعانا سيد القوم قمنا بالجهاد
ذا الجهاد اللي نعرفه وذا اللي نفهمه
مصلحتنا أدرى بها اللي يقودون البلاد
الشيوخ اللي تحل الحبال المبرمه
ينصرون الحق ويحاربون أهل الفساد
يا حصون المملكة يا الدروع المبهمه
يا حماة بلادنا فالصباح وفالهجاد
من خذ الارهاب سنة لا واحد يرحمه
فتنة لا بد يقضي عليها في المهاد
يطرح المجرم ويطرح سفيهاً يدعمه
لين حتى نار أخس البشر تصبح رماد
عندنا مستنقعٍ دوروا من يردمه
قبل سمه ينتشر فالدماغ وفالفؤاد
ما يجف إلا بقطع اليدين المجرمه
منهو اللي من هل الشر والظلم استفاد
أمة ترجع ورا للعصور المظلمة
ما لها بين الأمم لا مكان ولا قعاد
واللّه ان بعض العرب دمهم دم حلمه
مثل قشراً واقفه لا تساق ولا تقاد
