من وين جبت الهنا قفّى وسد الباب
ما جزتله لا ولا جزت لقوانينه
كني وكن العنا متبادلين اعجاب
من يوم رحتي وعيني راقت لعينه
لا غبت لحظه نشدني وش هي الأسباب
لا تهت عنه لقاني في عناوينه
من كثر ما صرت انا وياه حيل اقراب
من وين راح العنا يمي تلاقينه
وضعي تردى ومهما صار لي ما طاب
والقلب عنده يموت ولا تخونينه
من طيبته ما حسب له في جفاك حساب
كم قلت خانت وقال القلب مسكينه
يا بنت لو قلت لك مرتاح انا كذاب
وان قلت ما همني حالي تشوفينه
الله حسيب الهوى صدق الهوى غلاب
حبيت راسه وقلبي تحت رجلينه
