الله يبارك بالرجال العزيزين
اللي على أمن البلد ساهرينا
لجل الوطن وحمايته مستميتين
يستاهلون الشكر في كل حينا
عندي على مدح النشاما براهين
وافعالهم وقت الشدايد تبينا
بكشف الجرايم والقضايا خبيرين
وجهودهم ماهيب تخفى علينا
واخر عمل قاموا وفي ظرف يومين
بكشف الطغاة وشلة المعتدينا
الشلة اللي خالفوا منهج الدين
وقاموا بتفجير وفعل مشينا
هم وين والإسلام عن فعلهم وين
الفرق واضح والدليل بيدينا
أفعالهم ما ترتكبها الشياطين
وافكارهم ماجابها أي دينا
شعارهم تكفير كل المسلمين
وعاداتهم عصيان للوالدينا
يا شلة الإرهاب يا الجاهليين
بافعالكم خدمتم الكافرينا
يا احفاد ابن ملجم ترانا متبرين
من فعلكم يالزمرة الخارجينا
يا احفاد ابن ملجم على ويش ناوين
شوهتم الإسلام يا المارقينا
ما يختلف على مفاسدكم اثنين
يا زهرة الإرهاب يا المفسدينا
ما سلموا الأطفال هم والبريين
ومن فعلكم ما سلموا النايمينا
على وطنكم يا الحثالة جريين
وين العهود وحرمة المسلمينا
وين المحبة والوفا يا الرديين
وين السلام بروعة الآمنينا
تركتم القرآن هو والصحيحين
وتبعتم اللي للهوى تابعينا
واللي يأيد فعلكم يا المجانين
مجنون أو داعيه حقد دفينا
مثل الذي ينبح بلندن من سنين
بالكذب وبشب الفتن مبتلينا
ما عندنا شك بكذبه ودارين
لاهو وصي ولا عليه اشتكينا
ان كان هذا هو وجنه مصلحين
لا بارك الله في صلاح يجينا
يا أهل الفتن حنا لكم مستعدين
وعن هرجكم يا أهل الفتن ما درينا
حنا وطنا له جنود وفيين
معهم فكر ثاقب وقلب فطينا
يقودهم نايف بعزم وتمكين
نايف له القاسي يطيع ويلينا
خالقه ربي نقمة للمعادين
نظرة عيونه ترعب الخاينينا
وخالقه ربي رحمة للمساكين
وبلسم يداوي كل قلب حزينا
حنا سعوديين بالعسر واللين
وحكامنا آل سعود فيهم رضينا
حكامنا بالمدح والله جديرين
وحنا لهم شعب وفي أمينا
حكامنا اللي ماحكموا بالقوانين
دستورهم القرآن به حاكمينا
منا لهم سمع وطاعة وراضيين
فيهم وهم حكامنا العادلينا
حنا سعوديين بالعهد وافيين
ومن شذ منا فوق راسه وطينا
من شذ ماله غير قدم الملايين
يضرب بحد السيف لو هو حدينا
ويامملكتنا منزلك داخل العين
حنا على حبك وودك ربينا
يحفظك من نزل تبارك وياسين
ويحماك رب الكون والعالمينا
