يسيرني غلا بعض القصايد لا بدا منهاج
واحب الحرف لامنه رضا لعيون قيفانه
تجي مثل افتعالات الرياح اليا هدت الامواج
تجي مثل انفراجات الكريم بوجه ديانه
مثل ركض الأصايل باول الغاره بدون سراج
مثل فرحة غريب بعد مايّس عاد لاوطانه
ثلاث شهور زلت والقصايد حرفها ما داج
تجي مثل السحاب ونوب مثل رشاش هتانه
على بيض الوجيه وكل قرم للوفاء محتاج
سلام الله سلام للسنافي تطرب الحانه
سلام يا جمل مثل الصباح اليا بدا وانباج
سلام مثل نسمات الربيع بزاهي الوانه
على متن القصايد جيت اهيجنها بدون ازعاج
لابن عم ٍ عزيزٍ يعتبرني رابع اخوانه
كريم لا قسا وجه الزمان ولا انتخى المحتاج
حكيم لا غدا راي الحكيم وموقفه خانه
تنومسني علومك يابن عمي واعتليت ابراج
وغيرك لو اعده يابن عمي باخر الخانه
تنومس بك ربوعك لانك حصان طليق احجاج
حمر عينٍ حكيم تفهم الشاعر من السانه
ألا ياشوق عذرا وجهها ما يعرف المكياج
هنوف من غلاك تشومبك هيفا وريانه
جملها يا جملها لا حمى راس الشجاع وهاج
جملها لاشكا صدر الرفيق وضاق باحزانه
إلى قالوا: جمل ناصر يجي للكايده مخراج
علومه غانمة من طيب أبوه وطيب جدانه
