يا الله يا عالم خفي القلوبي
يا خالق المخلوق يا رب الارباب
يا غافر الزلات تغفر ذنوبي
وتستر عيوب مالها عد وحساب
يا رب تهديني حسين الدروبي
المستقيم اللي مشوه اولو الألباب
امشي بها الدنيا شمال وجنوبي
كني غريبة دار من عرض الاغراب
والنار شبت وسط صدري شبوبي
راحت حياتي بين طالب وطلاب
مشاكل صارت عليه سحوبي
ما تنتهي ممتدتن هوش وعتاب
ابي أتهرب مير وين الهروبي
لا صار مشكلتي من اصحاب واغراب
اقرب غريب عزوتي واغدروبي
وكتمتها ونزحت لديار الاجناب
وحطيت لي صدقان من كل صوبي
والمشكلة صدقت تفتيل الاشناب
ليا جيتهم وسط العرب رحبوبي
ولا وحيتهم تقول يا زين الاصحاب
وأنا لأني غبت عنهم حكوبي
سوالف تلسع مثل لسعة الداب
شطار الألسن والمراجل هبوبي
وليا نخيته قال كم تدفع اتعاب
دنيا بها ما عاش غير الكذوبي
واللي نصيح القلب يقعد ورا الباب
العذر والتمليق صارا محبوبي
والصادقين اليوم يا ناس غياب
من كثر خوفي صرت ما آمن بثوبي
واقول طبع الناس خاين وكذاب
وانا أدري انه في الرجال امحسوبي
لكن أقوله بين ثعبان وذياب
