سلط على الجوال في بعض الاحيان
لاجاب عن غالي علوم مريعه
راعتني علوم من فلان وفلان
جتني علوم يامساعد شنيعه
وياشينها شيناه في ذاك الانسان
علم فجعني واشهد انه فجيعه
قالوا بدرنا غاب من عقب ما بان
هفى وقفى وعاد عمره ربيعه
خبر وفاته ثار في القلب بركان
وتهشمت منه الضلوع الضليعه
اقولها صادق ولانيب غلطان
ويشهد على قولي مصادر رفيعه
مصادر افعاله دليل وبرهان
الطيب عشقه والوفاء به طبيعه
كاس المراجل شاربه دون نقصان
حر ولا له في الدروب الوضيعه
وعند المواجه طير مع ذيب وحصان
مير البلاء لاجاك نذل خديعه
طعنت غدر ماتمتحي طول الازمان
غادر غدر جعل اللوايع تليعه
ويابوه ابو منصور ياذرب الايمان
ماقدر الوالي لزوم تطيعه
وماينكتب في اللوح ماعنه روغان
هذي الليالي والليالي سريعه
اصبر وادع ربك لبدرك بغفران
ويجعل مقره في الجنان الوسيعه
وصلاة ربي عد ماكاين كان
على النبي اللي امر بالشريعه
