على عهد الوفا جيتك تسابقني لك اعذاري
انا آسف اذا من غير قصد بيوم زعلتك
تراني ماحسبت ان الغياب بيشغل افكاري
الين استأثرت غيبتك بالتفكير واشغلتك
انا داري عن شعورك تجاهي وانت بي داري
ولولا قدرك بنفسي ابد ما كان حايلتك
مجرد لحظة مرت عليّ ومالها طاري
سوى انك دايم بعيني ولا عمري تجاهلتك
انا من يوم ماضمّت خطاك دروب مشواري
كتبتك للوفا معنى وفي عين الغلا شلتك
تصورتك مثل شمس تبدد عتمة اقداري
وكنت اتخيل طيوف الاماني لاتخيلتك
وانا ادري ماشرهت الا وقلبي للوصل ضاري
ولا علمتك بسر العتب لولاي فضّلتك
طلبتك لاتزود في شعوري بالخطا.. ناري
تحملني مثل ما انا بزلاتك تحملتك
ترى عقب الزعل توني بعينك شفت مقداري
وضمك بالغلا قلب تعلت فيه منزلتك
اذا كان الخطا مني بلاقي عندك اعذاري
واقول ان كنت انا داري من اول كان زعلتك!!
