تكفين يمه لا تطيحين قومي
قومي عشان الصبح يلبس وقاره
تكفين قومي.. لا تزيدي همومي
اللي كوت قلبي بضيمك وناره
يا فرحة سنيني.. وصبحي ويومي
يا من حنينك.. ما يقاوم شعاره
طحتي وطاحت من مطيحك عزومي
والصدر طيّح عن ضلوعي جداره
من كربتك ضاقت عليّ هدومي
والدمع حاصرني وشدد حصاره
لا الزاد طايب لي ولا لذ نومي
لين السهر خلف فوجهي أماره
ويالله يا للي لك صلاتي وصومي
يا خالق الانسان باحلى مهاره
تشفي التي عاشت مرار السمومي
وذاقت من الآلام تاره.. وتاره
وانت الذي وحدك حنون ورحومي
ومن يرتجي غيرك يذوق الخساره
وتكفين يمه لا تطيحين قومي
قومي عشان الكون يلبس وقاره
يا فرحة سنيني وصبحي ويومي
ويا لولوة تذكار.. يا قلب ساره
