هذي منازل ربعنا والاصاحيب
وهذي معاذر كل قبا قحومي
يا دار وين مبهجين الشراريب
عقب الطرب مافيك زول يحومي
يا هيه يا أهل سايجات المحاقيب
حمر عليهن من شحمهن قدومي
مشارعات في حلول التشاريب
اسبق من اللي بالجناحين يومي
داروا عليهن سوقكم بالعراقيب
كلمه وخلوهن عساكم سلومي
ما كزهن خطو الرجاجه مناديب
ولا ركبهن دب عريض الخصومي
كزيتهن مني على منقع الطيب
نايف ولد هذال ملفى العلومي
زيزوم غلبا يوم تمشي جناديب
اطرافها تاطا الغبا والحزومي
اكوانهم قد بيحت بالاجانيب
وقد بيحت سد الحصان القحومي
ونجر توال الليل يلعي كما الذيب
يفرح به اللي قايم عقب نومي
على ثلاث دلال بيض مرابيب
على فطر ودلال غيره تصومي
وان جت نجوم الليل مثل المشاهيب
تلقا لبذله في صحونه رسومي
تلقا مدافقها على خالي الجيب
واللي بعد عقب النشامى يقومي
ندمح له الزلة ويدمح لنا العيب
نبيه عن ضداتها والزحومي
