يا مركب الأحزان وين انت داوي
إلى متى مرساك ما بان سيفه
العمر يمضي بالفؤاد الشقاوي
وأمسيت كل الليل عيني ذريفه
صارت حياتي والممات متساوي
ما أشفق على دنياي نفسي عفيفه
دايم يسج القلب مثل الخلاوي
ما سلته يا خوك روحٍ خفيفه
ويا مركب الأحزان ماني هواوي
لاشك ضايع بالحياة الكسيفه
والشعر عندي صاحب لي مخاوي
يومه يصد اللي سوات الهديفه
ويا شفت ذيب بعالي الرجل عاوي
ما بيح المكنون يبغى النكيفه
لا شك حدنه ظروف وبلاوي
والجوع يسري بالضلوع النحيفه
والحظ له عادة على طول ثاوي
قل السعد فاله وحظي وليفه
يا ما نخيته يوصلن للحراوي
لاشك عن دروب الشبه والمخيفه
ترى الصحيح إثبات ما هي هقاوي
ولا تحول التهمات نفس شريفه
والشين شين ما تفيد الدعاوي
ولا تستر العاري ثيابٍ رهيفه
ولو يجلب المطلوب كثر المناوي
كان الضعوف اليوم ما هي ضعيفه
