يا فؤادي.. تراك اليوم في الهم.. هايم
هم يبري، وهم يعود لي من قديمي
وش علام السعد عن قلبي الدهر صايم
كنّه اقسم عليه ما يكون النديمي
جوّي اليوم من عقب الصفا صار غايم
وارجي الله.. يزيل الغيم عني يقيمي
السعد فوق حزني صار طافي، وعايم
مثل مركب عليه من البضايع ركيمي
احمل الهم.. مير الهم ما هوب ضايم،
حيث ربي على عرشه بحالي عليمي
غافر الذنب.. قابل توبة اهل الجرايم
شارح القلب ذكره والكتاب العظيمي
لا فتحت التغابن.. شفت.. آي كرايم
تجلي الهم عني، والسعد.. يستديمي
والنصيحة من العمري خذوها علايم
من قرا قول ربه، صار سعده مديمي
خص.. لا صار في حقه تقي، وقايم
طبقه في حياته،، نور اللي ظليمي
والعمر لحظةٍ تمرق مرور الحمايم
يا الله.. حسن الخواتم.. يا عظيم كريمي
