يا من بيوت الشعر تنقاد أمامه
وليا نظمها دله الله على الزين
ياخذ من الموضوع ذروة سنامه
وباقي الرخيص يجنّبه للمقلين
عبدالعزيز اللي بعيدٍ مرامه
شيخٍ بوجهه للمراجل عناوين
مواقفه تفرض عليّ احترامه
وحقه ومقداره على الراس والعين
ومدحه لخوه اللي شريفٍ نظامه
بالعدل والرافه بحال المسنين
رجل المواقف دايم الاستقامه
ملجا اليتيم الي فقد بر الأبوين
ومسعف مريضٍ ما تشيله عظامه
لو ما يتم علاجه إلا ورا الصين
وملجا ضعيفٍ جاير الحمل ضامه
وابن الزعيم الي يضد المعادين
اللي وضع نفسه محل الخدامه
للمسجدين الطاهرين الشريفين
أخوين والشاعر بتالي ختامه
بالعز والتوفيق يدعي للاخوين
وما دار في باله وزبدة كلامه
ما غيركم يا اخوان نوره سلاطين
