قالوا تولم قربة عطلة الصيف
وش عذرك اللي تعتذر فيه عنا
يم الديار اللي بها يوجد الكيف
يدله بها راع السفر ويتهنا
رحلة وناسة واندماج وسواليف
واللي يبي راهي على ما تمنا
الجو بارد ماش عج وعواصيف
وحدايق من كل الأصناف غنا
قلت اتركوني ما عليها تحاسيف
ولا فيه شي يستحق اتعنا
ماني خوي اللي يريد الغطاريف
مهما يقول من الكلام ويزنا
أنا بدار شعبها يكرم الضيف
كل يقول معزب الضيف حنا
على معزة نحمد الله وتشريف
أمن وأمان وصيفنا بين أهلنا
ما الله بحاديني على الشام وجنيف
مدام يوجد مثلها في وطنا
يا ناس ليه البهذلة والتكاليف
تقول كل من بلاده مجنا
بكره تجون من السياحة مناكيف
البال ضأيق والمخابي فضنا
محد كسب غير التعب والمصاريف
كل يقول فلوسنا ما كفنا
غدوبها اللي للدراهم حراريف
طارت وحنا بالحيل ما فطنا
بين الفنادق والمسارح تناتيف
واللي بقاء مناك وأحيان منا
لو أنها ببلادنا ما بها حيف
على الأقل فلوسنا في وطنا
