تهيضت مما في ضميري وهيض بي
خلاً خالي ما فيه ذيبٍ ولا ظبي
تصبرت لين الصبر كمل وفيض بي
على هاجس يسبي فؤاد الشقي سبي
عسى لا يمن «سلطان بن مقعد الحضبي»
تجيب الليالي السود له عكس ما يبي
يحده زمانه والقدر يقضبه قضبي
يقوم ويطيح ومن ثقل همه يحبي
زمان الغرايب للغرابيب عرض بي
حداني زمان البين لين افتر عصبي
على غير شفي طول الأيام يركض بي
ولا فكني شره ولا حقق اطلبي
جروح جداد ومرمساتٍ تنقض بي
تعبت وعسى رب خلق يخلف تعبي
ألاحظ متل غيري وغيري يلاحظ بي
لاشك الذكي دايم ذكي والغبي غبي
أشوف الردي يأمر على الكفو لو غضبي
تأمر على اللي كان هو قبل له صبي
واعرف المنافق يشبه لفارة الخضبي
لا يفتي بما لا جازه الله ولا النبي
خبيث الطبايع في غيابي تلفظ بي
وأنا أطيب منه هو وأطيب من اصله نسبي
بأطق المنافق لو عيونه توغظ بي
وعلي بالحرام ان طقني لأحلق شنبي
