ياليل ياسرع الليالي علينا
ومن سرعها وقفت عن كل منطوق
تقبل وتقفي ما تجيها يدينا
وما يعرف لدوراتها كل مخلوق
نوب نقول العالم امسى أمينا
ونصبح على قولتهم الشعب مسحوق
وكثرت مبادي بعضها لك يبينا
ظاهر فرح باطن به السم مدفوق
هذا كتب بالحبر حقدٍ دفينا
وهذا يبث العلم والشر مسبوق
وهذا يحلل دون علمٍ يقينا
وهذا مشا قانون بياعة السوق
فيازمرة ابليس الرجيم اللعينا
مبدا السعودي ما تلاقيه مشقوق
والمملكة تحكم بشرعٍ متينا
ما يقبل التخمين ثابت وموثوق
تحكم بشرع الله ولا هي تلينا
حكمٍ كما نورٍ جلا الليل بشروق
من يوم ابو تركي زأر بالعرينا
عبدالعزيز اللي غزاها على النوق
ووحد شتاتٍ مزقته السنينا
وجته الجزيرة طوع عاشق لمعشوق
هي عشقته عاده رضيع وجنينا
وهو عشقها واشهد للاثنين بالذوق
وثبت دعايمها وبعده بدينا
بعزم الملوك اصبح لنا الطاق مطبوق
أعلوا منازلنا ومعهم مشينا
وكايد زمان الأمس ما يصبح العوق
وبقيادة الفهد السياسي الذهينا
جنب شعوبه راعدٍ وسطه ابروق
ما يلتفت للصوت لو له رنينا
وما يلتفت للزمرة اللي مع البوق
قايد وشعبٍ حبهم له معينا
والحب حادية الولا منبعه شوق
ومع الفهد معروف مرسى السفينا
مجاز لو قيل القمر قلت انا فوق
فمتى قبيح الفعل فعله يزينا
ومتى مريض القلب من نومه يفوق
