يا الله يا المعبود يارب الارباب
يا الواحد اللي كلنا نستخيره
ياغافر للعبد ذنبه الى تاب
يامقسم الارزاق ماحد خشيره
يامحدد الاجال كل له كتاب
ياخالق الانسان وبيدك مصيره
يارب ترحم من سجد لك بمحراب
يدعيك للي طايح في سريره
قالوا جروحه ماتداويه الاطباب
مابه رجاء وايام عمره قصيره
قلت القدر لاحل ماعنه مجناب
وانا برجاء اللي عالم بالسريره
ماخاب من يرجيك يارب ما خاب
ماضيع المعبود من يستجيره
الحمدلله كل شيء له اسباب
حكم القدر نرضاه شره وخيره
دعاك يونس وانفتح للدعاء باب
وانقذته من الحوت بأمر تديره
يالله طلبتك يارجاء كل منصاب
بامرك تساهيل الامور العسيره
تشفي «امين» اللي عليه الحشاء ذاب
وتجعل لنا في تالي الامر خيره
وصلاة ربي هازم جيش الاحزاب
على نبي ماقتدينا بغيره
