يوم اقبلت تخطف ندى الريحان لطف وخفه
ما كنها الا الصبح يوم اقبل يجر.. اقدامه
تحفة حسن من حولها غيمة غلا.. ملتفه
كل الحلا.. محبوس بين اقدامها والهامه
كن الثغر منها.. نهر.. والا الشفايف ضفه
ما شفت عمري نهر.. له ضفةٍ بَسّامه!
يحتار فيها من نظر لو هو صدق في وصفه
ويكذبه لي ما نظر.. واللي نظر ما لامه
تحفة حسن لاقت بعين اللي يعرف التحفه
ويسوم عمرٍ لاجلها.. لولا الغلا ما سامه
بعض الصدف فيها حلا.. يا ما حلا هالصدفه
وشلون ما يرتاح لي صادف فتاة احلامه
ويزفها بايقاع هادي للحنايا زفه
ويعيش معها ما بقى له من جميل ايامه
ويعاتب أول سينها.. لانه تصدر حرفه
مع ان اول اسمها.. سينه تصدر.. لامه؟!
