أكرم الهم همٍ فيه ثورة وله
وانتظارٍ على جمر المواعيد ذاب
ان حكينا زعل من لا نطيق زعله
وان سكتنا نسانا واستمر العذاب
كل ما قلت عن سر الغلا بسأله
وانفتح باب صك الوقت تسعين باب
كل حيٍ عدو اليوم ما يجهله
في حضور المحبه وش يكون الغياب
كل من جاد جوده من مواقف هله
ما يعز الجناب إلا عزيز الجناب
انت طيّب وطيبك كايدٍ مدخله
وانت بالوسم مأمور المطر والسحاب
ذات طيبك حجاجك بالوفا منهله
كل ناشد لقا له من وقاره جواب
طفل عذب الأماني بالوصل تكفله
لجل طيبك سجيّه ما تحسّب حساب
