بالله يا للي تبا الفيحا عنيزة ديرة أهل الفخر
يا سعد منهم عضوده بالشدايد والزمان العسير
نطاحة الكايده لا قل بالدنيا بعير الظهر
الطيب منهم وفيهم كلهم كبيرهم والصغير
جعل السلامة زهابك بالطريق الى نويت السفر
اسلم وسلم على عيال العميم صغيرهم والكبير
اهل الوفا والمروّه والشهامه لويشين الدهر
من يديك ليدين صالح خذ كتابي جعل خيرك كثير
يا بو محمد ليالينا تصافق مثل موج البحر
عجزت أميّز لها وجه او قفا يا الله مقسوم خير
واحترت مدري وش اخذ وش اخلي بين هم وقهر
المبتدا زين مير المقبلات الله علم وش يصير
اللي ذبحني بغير اسلاح ما جا منه علم او خبر
اللي بعقلي وروحي في حياتي صايرن لي خشير
متى على الله عيوني من صخيف الروح تملا النظر
القلب لولا الضلوع اللي يردنه خطير يطير
كن الشهر لي سنه عقب التفرق والدقيقة شهر
يا الله تلطف بحال المغرم العاشق عليل الضمير
يا صدق راع المثل قال الهوى والحب كله خطر
والزين مثل الحيا متبوع مشهاة الغني والفقير
اتلا الخبر يوم وادعني واقدماه طريق الحفر
للديرة اللي ورى الرقعي يقود القلب سلك الحرير
اصعب علي شوفته من شوفة اللي فوق سطح القمر
لا شك ابصبرا على ما صابني لين الفلك يستدير
وهذا رد الشاعر المعروف صالح العميم:
بالله يا للي من الزلفي لفيت مكلفن بالخبر
من شاعرن راية أهل العرف بيدينه وراية بصير
ريّح لما تاخذ الواجب علينا يا بعيد النظر
ما نذخر اللي يقود الوجه بالعادات ما نستعير
والى نويت السفر برعاية الله دوم دربك خضر
للديرة اللي تحلت بالرجال وبالمقام الشهير
باهل الكرم ما عليهم زود وأهل العز وأهل الظفر
من عصر الاجداد حتى هاليالي يكملون المسير
من بعد رد السلام اخذ الجواب وردنا مختصر
والله ما تقصر الهقوه وانا في خطوتي ما ستخير
قل لأحمد الناصر الشايع زعيم الشعر بدوا وحضر
هذا جواب العميم اللي شعيته يا جناب المدير
يا بو محمد ليالينا تصرفها صروف القدر
ما حدن مغيّر حياته عن تدابير الحكيم الخبير
عادات الأيام يمضي جوّها الصافي ويبقى الكدر
يا ما على كلمة الشاعر وديوانه يفوح العبير
لك حق تشكي من الفرقا وقلبك بالهوى ما عذر
ابن سبيل شكا ومحمد القاضي وغيرك كثير
والدار وحده ومثلك بالخليج مقدّرن معتبر
ان كان وقت الحبايب من مشاوير الزيارة قصير
والله يعينك على همّك وانا همي عذاب وسهر
من جاد لن غض صادفني نقض بالقلب جرحن خطير
الزول ما هو غريب وسحره الفتان موتن حمر
والمشكل الوقت عيّن لي عن اعيون الصبايا خفير
