المال نقص عند بعض الرجاجيل
لا ودعة بالبنك واهمل زكاته
وراعيه ما ينفق وطماع وبخيل
كلمة هلا ما قالها في حياته
ما يعرف أسعار العويدي ولا الهيل
ولا حقوق الضيف مع واجباته
ما شب ناره في نهار ولا ليل
دايم بوسط البيت وبابناته
يعرف دجاج يصلته وسط برميل
غطاه فوق الجمر بمتبلاته
حتبش لو زادت عليه المحاصيل
محروم والمحروم فعله شماته
مشغول بين الناس بالقال والقيل
يلعب به الهاجوس لو في صلاته
ماهوب راعي راي بالحيل حلحيل
لو تكر به بالهرج حمية حصاته
ولا غثته بقعا وشاف الغرابيل
محسوب كنه وحدة من خواته
يستاهله من يذبح الحشو والحيل
للضيف ما كل يسوى سواته
متسلسل من لاية تعسف الخيل
أفعال جدانه قبل سابقاته
ومجهز للقنص طير ودربيل
مع موتر فيه الدبل بكفراته
يطرد ورى طيره بوسط الغراميل
لا صاد له صيدة نزل قال هاته
والى ضواه الليل حط المعاميل
ركب عشاه ودلته من تلاته
والجسم صاحي ما يبي له تحاليل
ومراجعة دكتور ومعالجاته
وزهر النبات مشكل القاع تشكيل
فيه الخزامى يزهرها مجملاته
نور القمر كافيه متعلل الليل
مع واحد كل المراجل صفاته
في وسط عرق باسفله ناقع سيل
في خبة فيها الضبى وارداته
وعلى الفرايض دايم حرص بالحيل
ما يوم عن فرض تأخر وفاته
حافظ كلام الله يرتله ترتيل
يطلب رضى المعبود ويا حسناته
والفجر الى صلاة سبح بتهليل
وقرص الجمر سواه وسط جمراته
يأخذ ويعطي حق ما يعرف الميل
جنب عن الطماع ومغالطاته
ومن جاه في موضوع يلقى التشاهيل
ما يطلع إلا حاجته منه جاته
تمت بذكر مكمل الدين تكميل
رب يغفر الذنب مع سيئاته
