جار الزمان وشب بالقلب تنور
وقت الخطا مدبر ولافيه حيله
دمعي تحدر من على الخد منثور
دايم على الخدين يجري مسيله
ابات ليلي بالمصيبات مقهور
ليال ذقت الضيم ماهي بليله
من ضيم وقت هدم الدور وقصور
منكف على العالم بجيشه وخيله
ركب الرديف وحولوا راعي الكور
وقاموا يروونه نفوس ثقيله
لو كان له فضل على الناس مشهور
خلوه يوم انكف عنهم حصيله
لو كان ينطح له بمافات طابور
اليوم مسكين وحاله نحيله
محد يقول اعليت ياليت ماجور
وقت تغير دار دور بديله
لاعاد شان الوقت والحظ بدبور
والليث وندخ والقطو رز ذيله
الهر يفرس من حمامه وعصفور
ماتشتهي نفسه لزوم يجيله
من اول عند المناعير محقور
واليوم له يمنى عليهم طويله
كم واحد حر كريم ومنعور
يفرح بوجه الضيف عينه تخيله
صابه زمان به تعاكيس وكدور
في حالة عقب المعزه ذليله
ياحيف طاح وخاطره ظل مكسور
ماله صحيب صافي يشتكي له
عند الملازم يرجع الشور للثور
يفصل وله ربع رضوا بالفصيله
والحر شوره لو حكى فيه بالخور
ماشوف منهم واحد يصطبي له
كم ليث باتع من ردى الحظ ماسور
من شاف حاله قال واعزتي له
يغلي بقلبي من ردى الوقت ويفور
هم بجاشي ليت ربي يزيله
يوم الردي قد فاه والطيب مثبور
وقت الخطا ساعف نفوس رذيله
قالوا بعض ناس عن الطيب خايور
الكدش حطت بالخيول الاصيله
يامن يبرز لي ظلامه من النور
وقت تغير والمساعي قليله
لو يرجع اللي قد مضى ندي نذور
ومن الفرح كل يبرد غليله
