الله على سود الليالي.. يصبرك
يا قلب ما اقسى لهفتك وانتظارك
انهاك عن غلطة زمانك واحذرك
وتبعت شخص ساعي في دمارك
عجزت اوضح لك بعلم يسايرك
وانا اعرف انك ضايع باختيارك
انته تعاني.. والدقايق تخدرك
وتكبر معاها حيرتك وانكسارك
احلام عمرك والليالي.. تجرجرك
وانا انتظر غيضك.. ورد اعتبارك
لو كان خلك من غلاتك يدورك
لو طالت الفرقا.. من البعد زارك
مشكلتك انك غارق في تصورك
والشوق كله صاير مستشارك
اعرفك واعرف سر طبعك وخابرك
مهما شكيت وولّع الوجد نارك
اشواق تلفي بك وشوق يسفرك
رسبت بآخر فرصةٍ باختبارك
لا صرت ما تبخص حبيبٍ مسهرك
نم وانتظر.. وش يستجد بنهارك
