يا موطني لا يهزك غدر الأوغادي
أهل الحسد والحقد والكره مدحوره
انته مقر الرجال وسنة الهادي
وصحايفك في سماء الأمجاد منشوره
دايم مع الطيب لك وقفه وميعادي
فعايل من قديم الوقت مذخوره
دونك رجال تبيع الروح وتفادي
ناس على العهد معروفه ومخبوره
وحكم على الشرع لا جنب ولا حادي
العدل مبداه والقرآن دستوره
بقيادة العاهل اللي حاز الأمجادي
فهد اليا كلب الشارب وجاء دوره
دون الوطن يردع الطماع والغادي
لا تشتكي يا وطن في ظل أخو نوره
ما هو عن اللي يخون العهد نشادي
يسقيه كأس الطناء ويقصر اشبوره
واخوانه اللي بسوق المجد روادي
كل أخذ من سنام الطيب مقدوره
أعيال عبدالعزيز وكل الأحفادي
والشجره اللي بها الأمجاد مبذوره
والشعب معهم يسير جموع وأفرادي
ما يستمع في دعاوي ناس مأجوره
شعب محنك على النوماس معتادي
حب الوطن والكرامه فيه محفوره
ما همه اللي يروج زيف الأحقادي
ويرسل فتاويه من مخباه وجحوره
هذا ومثله ترى قلة وجحادي
الدين يكرم عليهم صف طابوره
الدين رحمه وعطف ونصح وارشادي
ما هو قنابل وحرفة ناس مسعوره
الدين معروف عند أهله والأضدادي
ما يقبل الغدر والارهاب وشروره
زرع القنابل ما هو نوماس وجهادي
خيانة للوطن والدين مثبوره
واللي يخون العهد والملح والزادي
في صفنا ما يجي فعله ولا شوره
وختامها يا وطن تفرح وتزدادي
ورايتك تبقى مع الأيام منصوره
